நான் அதிர்ஷ்டக்காரி இல்லையா?

ஒரு படம் ஹிட் ஆகாததால் நான் அதிர்ஷ்டக்காரி இல்லை என்பதா என்று ஆவேசப்படுகிறார் ஸ்ருதி ஹாசன். நடிகை ஸ்ருதி ஹாசன் கூறியதாவது: கடந்த சில வாரங்களுக்கு முன்பு வரை என்னை ‘அன்லக்கி’ (அதிர்ஷ்டம் இல்லாதவள்) என்று எழுதி வந்தார்கள். தெலுங்கில் நான் நடித்துள்ள ‘கப்பர் சிங்’ படம் சூப்பர் ஹிட் ஆகி உள்ளது. இப்போது அதிர்ஷ்டம் உள்ளவள் என்று எழுதுகிறார்கள். இந்தியில் நான் நடித்த படம் ஹிட் ஆகவில்லை என்பதால் அதிர்ஷ்டமில்லாதவள் என்றவர்களே இப்போது மாற்றி கூறுவது சந்தோஷம். வீட்டில் சிறுமியாக இருந்தபோதே அப்பா நடித்த படங்களின் வெற்றி, தோல்விகளை பார்த்திருக்கிறேன். ஒவ்வொரு படமும் என்னை பொறுத்தவரை அனுபவம்தான். இதுவரை நான் நடித்த படங்கள் எல்லாமே நல்ல படங்கள்தான். அதில் ஏற்று நடித்த வேடங்களை எண்ணி பெருமைப்படுகிறேன். ‘ஓ மை பிரண்ட்’, ‘3’, ‘7ம் அறிவு’ ஆகிய படங்களில் வலுவான, சுதந்திரமான கதாபாத்திரங்கள். எந்த வேடமாக இருந்தாலும் 100 சதவீத நடிப்பை தருகிறேன். ஆனால் முடிவில் என்ன வருகிறது என்பதற்கு நான் பொறுப்பல்ல. ‘எந்த படத்தில் நடிப்பது என்பதை அப்பா, அம்மாவிடம் கேட்டு முடிவு செய்கிறீர்களா’ என்று கேட்கிறார்கள். முதலில் நான் கதை கேட்பேன். அதில் நடிப்பதா, வேண்டாமா என்று சந்தேகம் எழுந்தால் மட்டுமே பெற்றோரிடம் அறிவுரை கேட்பேன். கமல்ஹாசன், சரிகா மகள் என்பதால் எனக்கு கூடுதல் பொறுப்பு இருக்கிறது. ரசிகர்களின் எதிர்ப்பார்ப்பை நான் பூர்த்தி செய்ய வேண்டும். அதுதான் என் வேலை. இன்னும்கூட சினிமாவிலும், இசையிலும் கற்றுக்கொண்டுதான் இருக்கிறேன்.